مر شهران علي ذلك ج٢

# عندما يحب القلب ## الفصل الأول: مستشفى "السراجي التخصصي" ، هذا الصرح الطبي العريق، الذي أسسه الجد الراحل قبل خمسة وعشرون عامًا، لم يكن مجرد مبنى من الزجاج والإسمنت، بل كان تاريخًا كاملًا لعائلة السراجي. في الطابق السادس، حيث تقع أقسام الجراحة العامة، كان الدكتور سامر السراجي يبدأ يومه كما اعتاد منذ ثلاثة أعوام يصل قبل الجميع، يراجع ملفات مرضاه بدقة متناهية، ثم يقف أمام النافذة الكبيرة المطلة على حديقة المستشفى يحتسي قهوته في صمت. هو في السادسة والثلاثين من عمره، جراحًا بارعًا يُشار إليه بالبنان، لكن يومه كان دائمًا نفس اليوم: عملية، جولة، ملفات، بيت فارغ، ونوم متأخر لا يحمل راحة حقيقية. فقد سامر زوجته "لينا" منذ ثلاثة أعوام في حادثة مأساوية، امرأة كانت – كما يصفها من عرفها – تعشق الحياة بكل تفاصيلها، تملأ البيت ضحكًا، وتصر على أن تكون كل لحظة تستحق أن تُعاش. رحيلها المفاجئ ترك في داخله فراغًا لم يستطع أحد ملأه، فانغمس في عمله كطبيب جراح، وتحول بيته إلى مجرد مكان للنوم، وقلبه إلى حصن مغلق لا يسمح لأحد بالدخول إليه مجددًا. --- في استراحة الأطباء، كان زميله الدكتور "هيثم" يحاول كعادته، وللمرة العاشرة هذا الشهر، أن يقنعه بشيء: "يا سامر، إنت لسه شاب، وحياتك مالهاش لازمة تفضل كده. أختي عندها صاحبة دكتورة أسنان، لطيفة جدًا، تحب أعرّفكم؟" ابتسم سامر ابتسامة متعبة وهو يقلّب في أوراقه: "يا هيثم، قولتلك قبل كده، أنا مش جاهز." "هتفضل مش جاهز لإمتى؟ لينا ربنا يرحمها، بس إنت لسه عندك حياة تعيشها." " هيثم ، من فضلك اقفل السيرة." ثم أردف بجدية هادئة، وقد كان صوته لا يحمل غضبًا بقدر ما يحمل تعبًا . "أنا مش حاسس إني عايز حد يدخل حياتي تاني. خلاص اتعودت على الشكل ده." نهض هيثم وهو يربّت على كتفه: "زي ما تحب، بس متسيبش نفسك للماضي يا صاحبي." مرّت الكلمات على سامر كما تمر كل مرة، دون أن تترك أثرًا يُذكر. كان قد أقنع نفسه تمامًا أن هذا الفصل من حياته قد أُغلق للأبد. --- في ذلك اليوم تحديدًا، وصلت حالة طارئة إلى قسم الاستقبال، ومر سامر من هناك في طريقه لمتابعة تقرير عاجل، وليس لأمر يخصه. كان القسم صاخبًا كعادته في ساعات الذروة، وبين الزحام، لمح فتاة جديدة يرتدي زي التمريض الأبيض، تحاول تثبيت أنبوب المحلول في يد مريض مسنّ يتألم، بينما يداها ترتجفان قليلًا من التوتر الواضح لمتدربة في أيامها الأولى. لكن صوتها، رغم ارتباك يديها، كان هادئًا: "متقلقش ... خد نفسك بس بهدوء معايا." لم يتوقف سامر وقتها، بل تابع طريقه دون أن يعير المشهد اهتمامًا خاصًا؛ فمشاهد كهذه يراها كل يوم في المستشفى. لكنه، دون قصد، سأل الممرضة المشرفة "خديجة" التي كانت تسير بجانبه بينما يراجعان تقرير حالة أخرى: "شكلها لسه بادئة." ردت خديجة عليه بعملية : "سمر سراج يا دكتور. متدربة جديدة، جت من أسبوع. بنت مجتهدة جدًا مع إن ظروفها المادية بسيطة... اتقبلت هنا بمنحة بعد ما تفوقت في الكلية." "طيب ربنا يوفقها." رد بعابر، وأكمل طريقه دون أن يلتفت مرة أخرى. --- بعد ساعتين من رؤيته لها ، وأثناء مروره على غرفة المريض المسنّ نفسه للاطمئنان عليه بعد العملية الصغيرة التي أجراها له، وجد سمر تجلس بجانب السرير تتحدث معه بينما هو يضحك رغم تعبه الواضح. توقف سامر عند الباب لحظة، لم يكن يقصد المراقبة، لكن شيئًا في المشهد جعله يبطئ خطاه. كانت تمسك بيد المريض وتقول له: "يلا يا عمّي، بكرة تكون ماشي زي الفل، وهطلب منك نعمل سباق" ضحك المريض ضحكة متعبة لكنها صادقة. ابتسم سامر بلا قصد، ابتسامة خفيفة لم يشعر بها إلا بعد أن غادر الغرفة. لم يكن الأمر انبهارًا ولا شيئًا كبيرًا، مجرد ملاحظة صغيرة عابرة سجّلها عقله دون أن يوليها اهتمامًا: أن هذه المتدربة الجديدة تحمل شيئًا مختلفًا في تعاملها مع المرضى، دفئًا لا يُعلَّم في الكليات. وقد نسي الأمر تقريبًا وسط زحمة يومه. --- في المساء، وبينما كان سامر يراجع ملفات المرضى في مكتبه بالمنزل، دخلت والدته "نسرين" حاملة صينية شاي كعادتها. "عامل إيه يا سامر؟ شكلك تعبان شوية النهاردة." "تمام يا أمي، يوم شغل طويل بس." رد وهو لا يرفع عينيه عن الأوراق. جلست نسرين تشرب شايها بصمت، تراقب ابنها كما تفعل دائمًا. لم تلحظ يومها شيئًا مختلفًا، فابنها كان كما هو، غارقًا في عمله، بعيدًا عن أي شيء آخر. لكنها، كأم، كانت تدرك أن هذا الروتين لن يدوم إلى الأبد، وأن يومًا ما سيأتي بشيء يهزّ سكون حياته. لم تكن تعلم أن بذرة ذلك اليوم قد زُرعت بالفعل، وإن كانت لا تزال صغيرة جدًا لدرجة أن سامر نفسه لم يشعر بوجودها بعد. ## الفصل الثاني مرّ أسبوع كامل على تلك الملاحظة العابرة في قسم الطوارئ، ولم يكن سامر يظن أنها تركت أثرًا يُذكر. كانت حياته لا تزال تسير على نفس الإيقاع: عملية، جولة، ملفات، بيت فارغ. لم يتغيّر شيء ظاهريًا، لكن شيئًا خفيفًا جدًا، لا يكاد يُلاحظ، بدأ يتسلل إلى روتينه دون أن يشعر. أما سمر، فكانت تخوض معركتها الخاصة. أول أسابيعها في مستشفى بحجم "السراجي" لم تكن سهلة؛ نوبات طويلة، ممرضات أقدم منها ينظرن إليها بحذر، ومريض أو اثنان لم يتقبلا أن "بنت لسه بتتدرب" تتعامل مع حالتهم. لكنها كانت تكابر، وتبتسم، وتكمل يومها بصبر من تعرف أنها لا تملك رفاهية الاستسلام. --- في ذلك الصباح، كانت خديجة تراجع معها قائمة المرضى: "يا سمر، فيه حالة في غرفة ١٢، سيدة كبيرة، هتعمل عملية بكرة، وعايزة حد يطمّنها. روحي اقعدي معاها شوية." "حاضر يا أستاذة خديجة." دخلت سمر الغرفة، فوجدت سيدة في الستينيات تجلس على السرير، وجهها يحمل قلقًا واضحًا. جلست بجانبها بابتسامة دافئة: "صباح الخير يا حاجة، عاملة إيه؟" نظرت السيدة إليها بعينين متعبتين: "خايفة يا بنتي... أول مرة أعمل عملية في حياتي." أمسكت سمر بيدها بلطف: "طبيعي إنك تخافي، بس أنا هقولك حاجة، الدكتور اللي هيعملها إيده... مفيش زيها. الناس بتيجي من محافظات تانية عشان بس تتعالج على إيده." "مين ده؟" "دكتور سامر السراجي." ابتسمت السيدة قليلًا، وكأن ذكر الاسم وحده منح راحة: "سمعت عنه كويس... ربنا يخليه." جلست سمر معها تتحدث، تسمعها، تشاركها ضحكة خفيفة هنا وهناك، حتى هدأ روع السيدة تمامًا. لم تلحظ أن الدكتور سامر كان يمر في الممر، وتوقف عند الباب لثوانٍ معدودة حين سمع اسمه يُذكر بهذا الشكل. لم يدخل، ولم يعلّق، لكنه ابتسم ابتسامة خفيفة جدًا وهو يكمل طريقه، ابتسامة لم يشعر بها هو نفسه إلا بعد أن ابتعد خطوات. --- بعد ساعات، وأثناء التحضير لحالة طارئة معقدة، وجد سامر نفسه يعمل مباشرة مع فريق يضم سمر ضمن المساعدين. كانت تلك أول مرة تقترب فيها من عالمه المهني الحقيقي. راقبته وهو يعطي أوامره بحزم وثقة، صوته هادئ رغم الموقف الحرج، يده لا ترتجف، وعقله يعمل بسرعة. لم يكن إعجابًا عابرًا هذه المرة، بل احترام حقيقي لرجل يتقن مهنته بامتياز. بعد انتهاء التحضيرات ودخول المريض غرفة العمليات، وقفت سمر في الممر تلتقط أنفاسها. اقترب منها سامر وهو يخلع قفازاته المؤقتة: "نفذتي دورك كويس النهاردة، خصوصًا إن الموقف كان ضاغط." "شكرًا يا دكتور... خفت شوية بصراحة، أول مرة أشوف حالة زي دي قدامي." ابتسم سامر ابتسامة مطمئنة: "الخوف ده طبيعي، وهو كمان دليل إنك بتاخدي شغلك بجدية. اللي مبيخفش هو اللي محتاج ياخد باله من نفسه." كانت تلك أول جملة يقولها لها لا تتعلق بمريض أو بمهمة، بل بها هي شخصيًا. شعرت سمر بدفء غريب في صدرها، لكنها لم تُعِره اهتمامًا كبيرًا، فقالت لنفسها إنه مجرد تشجيع من طبيب كبير لمتدربة صغيرة. --- في الأيام التالية، بدأت المسافة بينهما تتقلص ببطء شديد، دون أن يلحظ أي منهما ذلك بوضوح. سلام سريع في الممر، سؤال عابر عن حالة مريض، أحيانًا كوب شاي يشتريه سامر لنفسه من الكافيتريا فيجد نفسه يشتري كوبًا آخر "بالصدفة" دون أن يخطط لذلك، ثم يتردد قبل أن يقرر إعطاءه لها أو لا. في إحدى المرات، وجدها تجلس وحيدة في زاوية الكافيتريا بعد نوبة طويلة، تبدو منهكة. اقترب منها بتردد لم يعتد عليه: "تسمحيلي؟" أشار إلى الكرسي المقابل. رفعت رأسها بدهشة: "أه أكيد يا دكتور، اتفضل." جلس، ووضع أمامها كوب الشاي: "خدي، شكلك محتاجاه أكتر مني." ابتسمت وهي تأخذه: "متشكرة أوي." جلسا في صمت للحظات، ثم سألها بفضول لم يخطط له: "طيب قوليلي، إنتِ ليه اخترتي التمريض؟ مش شغلانة سهلة خالص." فكرت قليلًا قبل أن تجيب: "من زمان وأنا شايفة إن أحلى حاجة في الدنيا إنك تكون سبب في راحة حد تاني، حتى لو مش هتاخد مقابل غير ابتسامة أو دعوة. ماما كانت مريضة كتير وأنا صغيرة، وفيه ممرضة كانت بتقعد معاها ساعات تطمّنها من غير ما تتضايق، فضلت الصورة دي في دماغي." نظر إليها سامر بإعجاب صامت. لم تكن كلماتها مصطنعة أو محفوظة، بل خارجة من قلب حقيقي. "وإنت يا دكتور؟" سألته بدورها. "ليه اخترت الجراحة بالذات؟" توقف قليلًا، ثم أجاب بصدق نادر ما يشاركه مع أحد: "لأني حبيت إحساس إنك تقدر تنقذ حد بإيدك، مش بس بالدوا أو النصيحة. بس... الجراحة بتعلمك حاجة تانية كمان، إنك مش دايمًا هتقدر تنقذ الكل. وده أصعب درس اتعلمته." شعرت سمر أن هناك حزنًا خلف كلماته، لكنها لم تجرؤ على السؤال أكثر. اكتفت بالإصغاء، وهذا وحده كان كافيًا ليشعر سامر أنه تحدث أكثر مما اعتاد. --- بعد أن انصرف سامر، اقتربت خديجة من سمر وهي تحمل نظرة متفحصة: " سمر، أنا عايزاكي تاخدي بالك." "آخد بالي من إيه يا أستاذة خديجة؟" "من نفسك. أنا شايفة الدكتور سامر بقى بيقعد معاكي، وبيتكلم معاكي كتير عن حاجات مالهاش علاقة بالشغل. اوعي تقوليلي إنك مش ملاحظه." توترت سمر ، فواصلت خديجه كلامها. " يا سمر ، دكتور سامر ده مش زي أي حد. عيلته أصحاب المستشفى، وهو راجل عدى بحاجات صعبة أوي بعد وفاة مراته. أنا مش بمنعك من حاجة، بس خليكي واعية." نظرت سمر إليها بصدق: "أنا مقصدتش حاجة يا أستاذة خديجة، بجد. هو بس... طيب معايا." "أنا عارفة يا بنتي، وعارفة كمان إن القلب مش بييجي بأمر. بس خليكي حذرة، المستشفى دي فيها ناس كتير بتحب تتكلم." --- في مكتب الإدارة، وبعيدًا عن كل هذا، كان فؤاد يراجع تقارير الأداء الشهرية مع خديجة التي حضرت لعرض تقييم المتدربين الجدد. "إيه رأيك في الدفعة الجديدة؟" سأل فؤاد دون أن يرفع عينيه عن الأوراق. "كلهم كويسين يا دكتور فؤاد، بس فيه بنت اسمها سمر سراج، أداءها ممتاز جدًا، والمرضى بيحبوها أوي." توقف فؤاد للحظة عند الاسم، ثم أكمل مراجعته دون تعليق إضافي. لم يكن الاسم يعني له شيئًا وقتها، لكن القدر كان قد بدأ يحيك خيوطه ببطء، خيوطًا لم يكن أحد من العائلة يعلم إلى أين ستقودهم. --- مشت سمر إلى بيتها تلك الليلة، وكلمات خديجة تدور في رأسها. أما سامر، فجلس وحيدًا على شرفته، يتذكر تفاصيل الحديث البسيط، صدقها حين تحدثت عن أمها وحلمها. همس لنفسه بصوت خافت: "إنتِ بتعملي إيه فيّا يا سمر سراج؟" لم يكن يعرف إجابة، لكنه شعر، لأول مرة منذ وفاة زوجته، أن قلبه بدأ يخفق بإيقاع مختلف. --- ## الفصل الثالث مرّت ثلاثة أسابيع منذ ذلك الحديث في الكافيتريا، وأصبح شيئًا من الألفة يجمع بين سامر وسمر دون أن يعترف أي منهما بحقيقة ما يشعر به. صار سلامهما الصباحي أطول قليلًا، وأحاديثهما القصيرة في الممرات أكثر تكرارًا، لكنها ظلت في حدود ما يمكن تبريره: "دكتور يهتم بمتدربة واعدة." في تلك الفترة، كانت سمر تعيش في شقة صغيرة بحي شعبي مع والدها "سراج"، رجل متقاعد يعاني من ضعف في القلب، وقد توفيت منذ سنوات تاركة له ابنته الوحيدة سندًا له. كانت تعمل بجد لتغطية مصاريف العلاج المستمر لوالدها، ومنحة التدريب في مستشفى السراجي كانت بالنسبة لها فرصة العمر. --- في مساء أحد الأيام، وبعد نوبة طويلة، خرجت سمر من المستشفى منهكة، فوجدت السماء قد بدأت تمطر بغزارة مفاجئة. وقفت عند المدخل تنتظر أن تخف حدة المطر، وهي تتفقد ساعتها بقلق؛ فوالدها ينتظرها. "لسه واقفة ليه؟" سمعت صوت سامر خلفها. "المطر يا دكتور، هستنى يخف شوية وبعدين هاخد المواصلات." نظر إلى السماء الملبدة بالغيوم الداكنة: "ده شكله مش هيخف بسرعة. تعالي أوصلك." ترددت سمر: "لأ يا دكتور، معلش بلاش أتعبك." "ده في طريقي أصلاً." كذب سامر بابتسامة هادئة، رغم أن بيته كان في الاتجاه المعاكس تمامًا. ركبت سمر السيارة بتردد واضح، والصمت يخيم بينهما لدقائق. كسرت هي الصمت أخيرًا: "شكرًا يا دكتور، بجد مكنش لازم تتعب نفسك." "مفيش تعب. بس قوليلي، إنتِ ساكنة فين بالظبط؟" ذكرت له اسم الحي، فشعر بشيء من المفاجأة الصامتة؛ كان حيًا بعيدًا تمامًا عن عالمه، بسيطًا، مزدحمًا، لا يمت بصلة للأحياء الراقية التي اعتاد عليها. لم يعلّق، لكنه أدرك حينها بوضوح أكبر الفجوة الاجتماعية بينهما، فجوة لم يكن قد فكّر فيها من قبل. --- خلال الطريق، سألها بحذر: "طيب فيه حد بينتظرك في البيت؟" ابتسمت سمر بحزن خفيف: "بابا بس. أمي اتوفت من كام سنة، وبابا مريض قلب، فأنا بحاول أكون جنبه قد ما أقدر." شعر سامر بشيء يشبه الألفة تجاه كلماتها؛ فقدان يعرفه هو أيضًا، وإن كان بشكل مختلف. "أنا آسف على والدتك. وربنا يشفي والدك." "شكرًا يا دكتور. وإنت... خديجة قالتلي إنك فقدت زوجتك من كام سنة." قالتها بحذر شديد، خائفة أن تكون قد تجاوزت حدًا ما. توتر سامر للحظة، لكنه لم يشعر بانزعاج كما توقع من نفسه: "أيوه. من تلت سنين. لينا كانت... مختلفة. كانت بتحب الحياة بطريقة أنا نفسي معرفتش أتعلمها منها." "آسفة إني فتحت الموضوع." "لأ متتأسفيش، صراحة أول مرة من زمان أتكلم في الموضوع ده براحة كده." ثم نظر إليها بصدق وتوقف عن الكلام. نزلت سمر عند طرف حيها، شاكرة إياه، بينما بقي هو جالسًا في سيارته لدقائق بعد انصرافها، يستوعب ما قاله لتوّه، ويتساءل: "أنا فعلاً بدأت أرتاح لوجودها؟" --- في اليوم التالي، وأثناء اجتماع عائلي على مائدة العشاء في فيلا السراجي، كانت نسرين تلاحظ تغيرًا واضحًا في مزاج ابنها؛ ابتسامة تظهر فجأة دون سبب، شرود ذهني غير معتاد. "سامر، اللي واخد عقلك يا حبيبي؟" سألته وهي تقدم له طبقه. "معاكي يا أمي، ليه؟" "لأ، حسيتك بعيد شوية.." ثم أضافت بحنان: "بس والله شكلك أحسن من فترة، عينيك بقى فيهم حاجة كانت غايبة." تدخل فؤاد بعد أن مسح فمه بمحرمة الطعام: "أهم حاجة إن شغله ما يتأثرش. المستشفى فيها مسؤوليات كبيرة يا سامر، وإنت الاسم اللي هيكمل بعدي." "طبعًا يا بابا، شغلي هو الأول دايمًا." رد سامر بسرعة، محاولًا تجنب أي أسئلة إضافية. نظرت نسرين إلى ابنها بعين الأم التي تعرف أن هناك شيئًا أكبر من "الشغل" يدور في داخله، لكنها آثرت الصمت هذه المرة، منتظرة أن يأتي الوقت المناسب. --- عاد سامر إلى المستشفى لحالة طارئة وفي طريقه لمكتبه، سمع صوت جلبة في أحد الأقسام. اقترب فوجد سمر تتعرض لموقف صعب مع أحد أقارب مريض متوفٍ حديثًا، رجل غاضب يصرخ فيها ويحمّلها مسؤولية لا ذنب لها فيها: "إنتِ اللي قصّرتي معاه! إنتِ متدربة ملكيش خبرة أصلاً، إزاي يسيبوكي تتعاملي مع حالته!" كانت سمر تحاول أن تشرح بهدوء رغم أن الدموع تكاد تخنقها: "أنا عملت كل اللي المفروض أعمله يا فندم، وأبلغت الدكتور فور ما..." تدخل سامر فورًا بصوت حازم: "أستاذ، أنا الدكتور المسؤول عن الحالة، وأنا اللي هرد على أي استفسار عندك، مش الممرضة. تعالى مكتبي وهوضحلك كل حاجة بالتفصيل." أخذ الرجل بعيدًا، وترك سمر تحاول استعادة توازنها. بعد نصف ساعة، عاد إليها بعد أن هدّأ الرجل وأوضح له الموقف الطبي كاملًا. "إنتِ كويسة؟" سألها بقلق واضح لم يخفِه هذه المرة. مسحت دمعة كانت قد أفلتت: "أيوه يا دكتور، بس خفت شوية." "متخافيش، ده مش ذنبك في حاجة. الناس بتتعامل بعصبية وقت الحزن، ده طبيعي، بس إنتِ عملتي شغلك صح." ثم أضاف بصوت أهدأ: "أنا موجود، متقلقيش." كانت تلك الكلمة الأخيرة، "أنا موجود"، أكبر من أن تمر مرور الكرام على قلب سمر. شعرت للحظة أنها ليست وحدها في معركتها، شعور لم تختبره منذ فترة طويلة. ## الفصل الرابع مرّ شهر كامل منذ حادثة الرجل الغاضب، وأصبحت العلاقة بين سامر وسمر أعمق مما يمكن لأي منهما إنكاره، وإن ظلت في إطار "الصداقة المهنية" ظاهريًا. صار سامر ينتظر لحظات وجودها في نفس القسم، وصارت هي تجد نفسها تبتسم بمجرد سماع صوته في الممر. لكن ما بينهما لم يكن قد أخذ اسمًا بعد، وكلاهما كان يخشى أن يكون أول من يكسر هذا الصمت. --- في ذلك المساء، أُقيم حفل خيري صغير في بهو المستشفى بمناسبة الذكرى السنوية لتأسيسه، حضره أغلب الكادر الطبي والإداري، من بينهم عائلة السراجي بأكملها. كانت سمر من ضمن الطاقم المكلف بالتنظيم، ترتدي فستانًا بسيطًا أنيقًا اقترضته من زميلة لها، إذ لم تكن ميزانيتها تسمح بشراء ملابس مناسبة لمناسبات كهذه. وقف سامر من بعيد يراقبها وهي تساعد في ترتيب الطاولات، تضحك مع الممرضات الأخريات، تتحرك بخفة رغم إرهاق يوم عمل طويل سبق الحفل. اقترب منها هيثم: "يا سامر، إنت بقالك ربع ساعة واقف تتفرج على نفس النقطة. حد ملفت نظرك؟" انتبه سامر لنفسه فجأة: "لأ، بس... تعبان شوية." ضحك هيثم بخبث: "تعبان وعينيك رايحة جاية على المتدربة الجديدة؟ يا سامر، أنا صاحبك من كذا سنة، تفتكر معرفش أقرا وشك؟" توتر سامر: "بلاش سخافة يا هيثم." "مش سخافة، ده أنا مبسوط لك. من زمان مشفتكش بتبص لحد بالشكل ده. بس إنت عارف الموضوع صعب، صح؟ العيلة، المكانة، كلام الناس..." صمت سامر، لأن كل كلمة قالها هيثم كانت صحيحة، وكانت بالضبط الأفكار التي يحاربها في رأسه كل ليلة. --- خلال الحفل، وأثناء لحظة هدوء نسبي، خرجت سمر إلى الشرفة الخارجية للمكان لتلتقط أنفاسها بعيدًا عن الزحام. تبعها سامر بعد دقائق، متعللًا بحاجته للهواء أيضًا. "مبسوطة بالحفله؟" سألها وهو يقترب. "أيوه جدًا، أول مرة أحضر حاجة زي كده." وقف بجانبها، صمتٌ مريح يخيم بينهما، حتى قال بصوت هادئ لم تعتد عليه منه: "سمر... أنا عايز أقولك حاجة من فترة، بس مش عارف أبدأ منين." نظرت إليه بقلب يتسارع: "قول يا دكتور." "مش عايزك تناديني دكتور دلوقتي." ابتسم ابتسامة خافتة، ثم جدّية عادت لملامحه. "أنا... بحس إن فيه حاجة اتغيرت جوايا من يوم ما جيتي. مكنتش متخيل إني هقدر أحس بالإحساس ده تاني بعد لينا. وده مخوفني بصراحة، لأني مش عارف أعمل فيه إيه." شعرت سمر أن قلبها يكاد يتوقف: "أنا كمان يا دكتور.." ثم توقفت خجلة . "أنا كمان حاسة إن في حاجة بينا، بس خايفة أوي. إنت من عيلة كبيرة، وأنا... أنا بنت عادية جدًا. مفيش تناسب بينا." أمسك يدها بلطف، للمرة الأولى: " أولاً أنا دلوقتي سامر وبس ، ثانياً التناسب ده كلام الناس، مش كلام القلب." بقيت سمر صامتة، دموع الفرح تكاد تخنقها، قبل أن تسحب يدها برفق: "أنا محتاجة وقت أفكر . مش عشان مش حاساك، بس عشان خايفة على الاتنين مننا." تفهم سامر، وابتعد قليلًا بابتسامة حزينة لكنها صادقة: "خدي وقتك اللي إنتِ عايزاه. أنا مش هستعجلك، بس عايزك تعرفي إن الكلام ده مش نزوة، ده أصدق حاجة قلتها من زمان." --- عادت سمر إلى بيتها تلك الليلة في حالة اضطراب شديد بين الفرح والخوف. جلست بجانب والدها الذي كان يشاهد التلفاز في هدوء: "يا بابا... لو حبيت حد، بس ظروفه مختلفة عني خالص، تفتكر أعمل إيه؟" نظر إليها والدها بابتسامة عارفة: "الحب مبيبصش لظروف يا بنتي، بس الحياة بتبص. المهم إن الراجل يبقى صادق معاكي، وإنه يقدر يقف جنبك وقت الصعب، مش بس وقت الفرح." فكرت سمر طويلًا في كلماته تلك الليلة، وهي تستعيد كل لحظة جمعتها بسامر، محاولة أن تفرّق بين خوفها من المجتمع، وصدق ما تشعر به فعلًا. --- أما سامر، فعاد إلى بيته وقد اتخذ قرارًا في داخله لم يعد قادرًا على تجاهله: لن يترك هذه المشاعر تمر دون أن يحاول، مهما كانت العقبات التي تنتظره، ومهما كان رد فعل والده حين يعلم. جلس يتأمل صورة قديمة للينا على مكتبه، وهمس: "معلش يا لينا، بس أنا مش قادر أفضل واقف في نفس المكان للأبد. إنتِ اللي علمتيني إن الحياة لازم تتعاش." ## الفصل الخامس مرّت أيام قليلة بعد ليلة الحفل، وسمر لم تعطِ سامر إجابة واضحة بعد، لكن كل نظرة بينهما كانت تحمل إجابة لم تحتَج كلمات. كان الاثنان يعيشان في حالة معلقة بين الخوف والرغبة، حتى جاء ذلك اليوم الذي غيّر كل شيء. --- كانت سمر في نوبتها الصباحية حين رنّ هاتفها فجأة برقم جارتها. أجابت بقلق: "أيوه يا أم كريم، في إيه؟" "يا بنتي تعالي بسرعة، والدك وقع في الحمام، وشكله مش قادر يتحرك!" اصفرّ وجه سمر، وتركت كل شيء من يدها راكضة نحو المخرج. صادفها سامر في الممر فلاحظ حالة الهلع على وجهها فورًا: "سمر، في إيه؟ إنتِ كويسة؟" "بابا... بابا وقع في البيت، لازم أروحله دلوقتي!" لم يفكر سامر مرتين: "أنا هوديكي بعربيتي، يلا بسرعة." --- وصلا إلى الشقة الصغيرة ليجدا والد سمر ملقًى على الأرض، واعيًا لكنه يتألم بشدة، ووجهه شاحب بشكل مقلق. تفحصه سامر بسرعة بخبرته الطبية: "لازم يتنقل المستشفى فورًا، الأعراض دي مش طبيعية، ممكن يكون في مشكلة في القلب." نقلاه بسيارة سامر مباشرة إلى مستشفى السراجي، حيث أشرف سامر بنفسه على دخوله قسم الطوارئ، مستخدمًا كل نفوذه لضمان أفضل رعاية ممكنة رغم أن الحالة ليست تخصصه المباشر. جلست سمر في الممر تنتظر، يداها ترتجفان، ودموعها لا تتوقف. جلس سامر بجانبها دون كلام، فقط أمسك يدها بصمت، محاولًا نقل بعض القوة إليها. "هيبقى كويس يا سمر، أنا هعمل اللي عليا وأكتر." "خايفة عليه ... هو كل اللي عندي في الدنيا." ضمّها بحنان دون أن يفكر في الأعراف أو من يراهما: "إنتِ مش لوحدك، أنا هفضل جنبك مهما حصل." --- بعد ساعات من الفحوصات، خرج الطبيب المختص ليخبرهما بالتشخيص: قصور حاد في عضلة القلب، حالة خطيرة تحتاج متابعة دقيقة ومستمرة، مع احتمالية ضعيفة لنجاح أي تدخل جراحي بسبب تقدمه في العمر وضعف حالته العامة. انهارت سمر عند سماع الخبر، وسامر يحاول تماسكها: "احنا هنعمل كل اللي في إيدينا، فيه علاجات وفيه متابعة، الموضوع مش نهاية الطريق." لكن في داخله، وبخبرته الطبية، كان يعرف أن الوقت المتبقي لسراج قد يكون قصيرًا جدًا، حقيقة قرر أن يخفيها عن سمر مؤقتًا حتى لا ينهار قلبها أكثر مما هو منهار بالفعل. --- في الأيام التالية، أصبح سامر يزور سراج يوميًا بنفسه، يتابع حالته شخصيًا رغم أنها ليست من مسؤولياته المباشرة، ويقضي وقتًا طويلاً بجانب سريره يتحدث معه، حتى بدأ سراج نفسه يلاحظ شيئًا في نظرات الطبيب الشاب تجاه ابنته. في إحدى الزيارات، وبينما كانت سمر قد خرجت لإحضار بعض الأغراض، أمسك سراج بيد سامر بضعف: "يا دكتور سامر... إنت بتحب بنتي، صح؟" تفاجأ سامر بالسؤال المباشر، لكنه لم يكذب: "أيوه يا عمّ سراج، بحبها بجد." ابتسم سراج ابتسامة متعبة لكنها مليئة بالرضا: "أنا شايف ده في عنيك. بنتي دي كنز يا دكتور، اتربت صح، وقلبها أبيض. لو ربنا كتب بينكم حاجة، خليك سند ليها. أنا... حاسس إن الوقت اللي فاضلي مش كتير." "متقولش كده يا عمّ سراج، إنت هتبقى كويس." نظر إليه سراج بعينين تعرفان الحقيقة: "خلي بالك من بنتي لو جرالي حاجة." كانت تلك الكلمات ثقيلة على قلب سامر، لكنها أيضًا زرعت فيه قرارًا بدأ يتشكل بوضوح: لن يسمح لسمر أن تواجه القادم وحدها مهما كلّفه الأمر. لمتابعة بقية الحكاية تابع صفحه " سحر الفيروز " وانتظر الجزء الجديد.

مقالات ذات صلة

صحيت من المستشفى لقيت نفسي بكليه واحده

جوزوني معاق

مهرة ج 1

بعد نص ساعه من اقلاع الطائره

رفقا بالقوارير…

جوزي دخل ياخد دش

اترك تعليقاً إلغاء الرد